ایک نیوز:وفاقی وزیر داخلہ محسن نقوی سے اٹلی کے وزیر داخلہ میٹیو پینٹے ڈوسی نے ملاقات کی ہے۔

تفصیلات کے مطابق وزیر داخلہ محسن نقوی نے اپنے اطالوی ہم منصب کو گزشتہ رات بھارت کی بزدلانہ کارروائی اور جارحیت کے محرکات سے آگاہ کیا،اور کشیدگی میں کمی لانے کے لئے بامقصد کوششوں کی ضرورت پر زور دیا۔

اطالوی وزیر داخلہ  نے  26 شہریوں کے جاں بحق ہونے پر اظہار افسوس اور سوگوار خاندانوں سے اظہار تعزیت کیا۔

محسن نقوی نے اطالوی وزیرداخلہ کو بتایا کہ بھارت نے شہری آبادی کو نشانہ بنا کر بین الاقوامی قوانین کی دھجیاں اڑائیں،بچوں،خواتین سمیت 26 شہری شہید ہوئے۔

انہوں نے بتایا کہ پاکستان کی مسلح افواج نے بھارتی جارحیت کا منہ توڑ جواب دیا اور دشمن کے 5 لڑاکا طیارے تباہ کئے،پہلے دن سے بھارت کے خطرناک عزائم سے دنیا کو آگاہ کر رہے تھے، خطے کی صورتحال کو خراب کرنے کا ذمہ دار بھارت ہے۔

ملاقات میں پاکستان اور اٹلی کے درمیان تجارتی، سکیورٹی تعلقات اور باہمی دلچسپی کے امور پر بھی گفتگو ہوئی، اٹلی کے ساتھ سکیورٹی، انسداد منشیات و انسانی سمگلنگ اور دہشتگردی کے خلاف تعاون مزید مؤثر بنانے پر اتفاق کیا گیا۔

اطالوی وزیر داخلہ  نے انسداد دہشتگری،انسانی سمگلنگ اور انسداد منشیات میں تعاون کو مزید آگے بڑھانے کے عزم کا اعادہ کیا۔

محسن نقوی  نے کہا کہ غیر قانونی امیگریشن اور اس کے سہولت کاروں کے خلاف سخت کارروائی ہمارا اولین ہدف ہے۔

دونوں ممالک نے منشیات اور دیگر جرائم کے خلاف مشترکہ لائحہ عمل کے لیے جوائنٹ ورکنگ گروپ بنانے کا فیصلہ کیا ہے۔

اطالوی وزیر  نے یقین دہانی کرائی کہ   بارڈر سکیورٹی کو مزید مضبوط بنانے کیلئے اطالوی ٹیم جلد پاکستان کا دورہ کرے گی۔  

محسن نقوی نے کہا کہ پاکستان اور اٹلی کے مابین منشیات کی روک تھام کے لیے تعاون کو مزید آگے بڑھانے کیلئے تیار ہیں،پچھلے سال 3000 سے زائد غیر قانونی انسانی سمگلنگ میں ملوث افراد اور 500 سہولت کار پکڑے جا چکے ہیں۔

اٹلی اور پاکستان کے مابینٹرانز نیشنل جرائم کے ضمن میں ڈیکلریشن اور مائیگریشن اور لیبر موبیلٹی پر ایم او یو سائن کرنے پر اتفاق کیا گیا۔

اٹلی کے وزیر داخلہ نے انسانی اسمگلنگ اور منشیات کی روک تھام میں پاکستانی اداروں کی پیشہ ورانہ صلاحیتوں کو سراہا۔